សហព័ន្ធ​កីឡា​បាល់​ទាត់​កម្ពុជា (FFC) បាន​កោះហៅ​កីឡាការិនី​ឆ្នើមៗ​ចំនួន​២៨នាក់ មក​ប្រមូល​ផ្តុំ​ហ្វឹកហាត់​ជាមួយក្រុម​ធំជម្រើសជាតិនារីកម្ពុជា ដើម្បី​ត្រៀមការប្រកួតវគ្គជម្រុះពានរង្វាន់ AFC Women's Asian Cup Australia 2026 ចំណែក​ក្រុម​U19ជម្រើសជាតិ​នារី​កម្ពុជា បានបង្ហាញការ​តាំង​ចិត្ត​លេង​ឱ្យបាន​ល្អ សម្រាប់​ការ​ប្រកួត​ចុងក្រោយ​ជាមួយ​ក្រុម​ការពារ​តំណែង​ជើងឯក​របស់​ថៃ ក្នុងពាន​ ASEAN U19 Girls’ Championship 2025 នៅ​ថ្ងៃសុក្រនេះ។

ក្រុម​កីឡាការិនីជម្រើសជាតិ​កម្ពុជា​អាយុក្រោម​១៩​ឆ្នាំ នឹងត្រូវ​ធ្វើការ​ប្រកួតបញ្ចប់ពូល​B​ជាមួយ​ក្រុម​កីឡាការិនី​ជម្រើសជាតិ​ថៃ​អាយុ​ក្រោម​១៩​ឆ្នាំ នៅលើទឹកដី​ប្រទេស​វៀតណាម នា​រសៀល​ម៉ោង​៣ ថ្ងៃសុក្រ​នេះ ចំណែក​ក្រុម​U19ជម្រើសជាតិនារី​ឥណ្ឌូនេស៊ី ក៏​ត្រូវ​ប្រកួតកាត់សេចក្តី​ជាមួយក្រុមU19ជម្រើសជាតិនារី​ម៉ាឡេស៊ី នៅ​ម៉ោង​ជាមួយគ្នា​ផងដែរ។

យ៉ាងណាក៏ដោយ តាម​រយៈ​ការ​ប្រកួត​ជម្រុះ​២​លើក​ក្នុងពូលនេះ ក្រុម​U19ជម្រើសជាតិនារី​កម្ពុជា ទើប​រក​បាន​១ពិន្ទុទេ ដោយ​ពួកគេ បានចាញ់​ក្រុមនារី​ម៉ាឡេស៊ី ៤-០ ក្នុងការ​ប្រកួត​បើក​ឆាក កាលពី​ថ្ងៃច​ន្ទ និងបានស្មើ ១-១ ជាមួយ​ក្រុម​នារី​ឥណ្ឌូនេស៊ី កាលពី​ថ្ងៃពុធ ហើយវា​ក៏ជាកំណត់ត្រាថ្មី​សម្រាប់​ក្រុមនារីកម្ពុជា​ដែរ ដែល​​ស្មើ​ជាមួយ​ក្រុមនារីឥណ្ឌូនេស៊ី ក្នុង​ពាន ASEAN U19​នេះ ព្រោះការជួបគ្នា​២​លើក​កន្លងមក ក្រុមនារីកម្ពុជា បានចាញ់ ១-០ កាលពី​ឆ្នាំ​២០២២ និងបានបន្តចាញ់ ៤-០ កាលពី​ឆ្នាំ​២០២៣។

ចំពោះការ​ស្មើ ១-១ ជាមួយ​ក្រុម​U19ជម្រើសជាតិនារី​ឥណ្ឌូនេស៊ីនេះ អតីតខ្សែ​ប្រយុទ្ធដ៏​ឆ្នើម​របស់​ក្រុមជម្រើសជាតិកម្ពុជា ឃួន ឡាបូរ៉ាវី ដែល​ធ្លាប់​ដឹកនាំ​ក្រុម​ជម្រើសជាតិនារីកម្ពុជា បានបង្ហោះសារ​អបអរដល់​ក្រុម​U19នារីកម្ពុជា បែបនេះ​ថា៖ «គ្រាប់បាល់​១គ្រាប់ៗ ពិន្ទុ​១ពិន្ទុៗ របស់ក្រុមជម្រើសជាតិ មិនមែនបានមកដោយងាយនោះទេ។ សូមសាទរសម្រាប់គ្រាប់បាល់ និងពិន្ទុដំបូងរបស់ក្រុមនារីU19»។

ជាមួយគ្នានេះ ​អ្នកស្រី ឈឺ នីផា គ្រូ​បង្គោល​ក្រុម​U19ជម្រើសជាតិនារី​កម្ពុជា បានមើលឃើញ​ថា កូនក្រុមរបស់​អ្នកស្រី ហាក់នៅមានអារម្មណ៍ភ័យ ពេល​​ប្រកួតជាមួយក្រុមនារី​ម៉ាឡេស៊ី តែ​ពួកគេ ចាប់មានទំនុក​ចិត្ត និង​ធ្វើបាន​ល្អ ហេតុនេះ​អ្នកស្រី​ជឿថា ការជួបក្រុម​នារី​ថៃ ថ្ងៃនេះ ក្រុមនារី​កម្ពុជា នឹងកាន់តែមានទំនុក​ចិត្ត​ខ្លាំង ហើយ​ក៏បានតាំងចិត្ត​បង្ហាញពីការ​លេង​ឱ្យបាន​ល្អ​ផងដែរ ទោះ​លទ្ធផល​ចាញ់ ឬឈ្នះ។

តាម​រយៈ FFC អ្នកស្រី ឈឺន នីផា បាន​និយាយ​ថា៖ «ការជួបក្រុមថៃ ជាការប្រកួតដ៏តាន​តឹង ប៉ុន្តែ​យើងក៏បានត្រៀម និងរៀបចំ​ខ្លួនរួចរាល់​ផងដែរ ហេតុនេះយើងសង្ឃឹម​ថា ក្មេងៗ​របស់​យើង នឹងលេងបានប្រសើរជាងការ​ប្រកួត​មុនៗ។ មិន​ថាលទ្ធផល​យ៉ាងណា ប៉ុន្តែ​ខ្ញុំ​ជឿជាក់ថា កីឡាការិនី​របស់យើង នឹងលេង​ឱ្យល្អមើល​ជូនបងប្អូន ជាទស្សនិកជន បានទស្សនា»។

យ៉ាង​ណាក៏ដោយ ការជួបក្រុមU19ជម្រើសជាតិនារី​ថៃ នៅថ្ងៃសុក្រ​នេះ គេ​មិនរំពឹង​ថា ក្រុម​U19នារីកម្ពុជា អាច​ដណ្តើមបានពិន្ទុ​បន្ថែមនោះ​ទេ ព្រោះ២ប្រកួត​កន្លងមក​នេះ ក្រុមនារី បាន​លត់​ក្រុម​នារី​ឥណ្ឌូនេស៊ី ៦-១ និងបន្តយក​ឈ្នះក្រុមនារី​ម៉ាឡេស៊ី ៧-១ ហើយ​បានឈ្នះកៅអី​ឡើង​ទៅ​វគ្គពាក់កណ្តាលផ្តាច់ព្រ័ត្ររួចទៅ​ហើយ ហេតុនេះ​ពួកគេ មិនបណ្តោយ​ឱ្យ​ចាញ់​ក្រុមនារី​កម្ពុជា​នោះទេ ខណៈការជួបគ្នា ក្នុងពាន​រង្វាន់នេះ កាលពី​ឆ្នាំ​២០២២ ក្រុមនារី​ថៃ បាន​យក​ឈ្នះក្រុមនារី​កម្ពុជា ៤-០។

ដោយឡែក FFC ទើប​​បង្ហាញ​បញ្ជីរាយនាមបឋមនៃ​ក្រុមកីឡាការិនីជម្រើសជាតិកម្ពុជា ទាំង​២៨នាក់ កាលពី​យប់មិញ ដោយក្នុង​នោះ កីឡាការិនី​មកពីក្លិប​ភ្នំពេញក្រោន និងក្រុម​វិសាខា ត្រូវបានជ្រើស​រើស​មក​ប្រមូល​ផ្តុំ​ច្រើនជាងគេ ព្រោះ​ក្រុមទាំង​២នេះ កំពុង​ធ្វើបាន​ល្អ ក្នុងការ​ប្រកួតលីគនារី​កម្ពុជា ឆ្នាំ​២០២៥​ (Cambodian Women's League) ដោយ​​បាន​ឈ្នះទាំង​២​ប្រកួត​ជាប់ៗគ្នា។

តាម​បញ្ជី​រាយនាមកីឡាការិនី​​២៨នាក់ដំបូងនេះ គឺ​មាន​​កីឡាការិនី​របស់​ភ្នំពេញ​ក្រោន រហូត​​ដល់​៩នាក់ និងកីឡាការិនី​របស់​​វិសាខា ៧នាក់ ចំណែក​កីឡាការិនី​​១២នាក់​ទៀត គឺមានមក​​ពី​ក្លិប​ណាហ្គាវើលដ៍ ៤នាក់ ក្លិប​បឹងកេត ២នាក់ ក្លិប​ព្រះខ័នរាជស្វាយរៀង ២នាក់ ក្លិប​បាល់​ទាត់​សៀមរាប ២នាក់ ក្លិបបាល់​ទាត់មីស្ទើរលេង ១នាក់ និង​កីឡាការិនី​របស់សហព័ន្ធ​កីឡាបាល់ទាត់​កម្ពុជា​១នាក់។

យ៉ាងណាក៏ដោយ ក្រុមម្ចាស់ផ្ទះកម្ពុជា មានពេលប្រមូល​ផ្តុំហ្វឹក​ហាត់​ជុំ​គ្នា បាន​ជាង​១០​ថ្ងៃទេ  ព្រោះ​ពាន AFC Women's Asian Cup Australia 2026​ ក្នុងពូល​Gនេះ នឹងចាប់​ផ្តើម​ប្រកួតជម្រុះ​នៅពហុកីឡដ្ឋានជាតិអូឡាំពិក ចាប់ពី​ថ្ងៃទី​២៩ ខែមិថុនា ដល់ថ្ងៃទី​៥ ខែកក្កដា​ ដោយក្នុង​នោះ​ ក្រុមនារី​កម្ពុជា ត្រូវ​ជួបក្រុមនារី​ជម្រើសជាតិហុងកុង នៅ​ថ្ងៃបើក​ឆាក រួច​បន្ត​ប៉ះ​ក្រុមនារី​ហ្វីលីពីន ថ្ងៃទី​២ កក្កដា និង​ចុងក្រោយ​ជួប​ក្រុមនារីអារ៉ាប៊ីសាអូឌីត នៅ​ថ្ងៃទី​៥ ខែកក្កដា៕

បញ្ជីរាយនាមបឋមនៃក្រុមកីឡាការិនីជម្រើសជាតិកម្ពុជា ទាំង២៨នាក់ សម្រាប់ត្រៀមការ​ប្រកួត​ជម្រុះ​ពាន AFC Women's Asian Cup Australia 2026។ រូប​ថត FFC