ខ្សែបម្រើប្រយុទ្ធកូឡុំប៊ី Nieto Rondon (ក្រហម) ពេលលេងឱ្យក្រុមភ្នំពេញក្រោន តែពេលនេះរូបគេបានចាកចេញហើយ។ រូបថត ភ្នំពេញក្រោន
ភ្នំពេញក្រោន បានចាត់ទុកកីឡាករបរទេស ដែលបានចាកចេញជាបន្តបន្ទាប់ថា ជាតួអង្គសំខាន់ ក្នុងការទទួលបានជ័យជម្នះដ៏គួរឱ្យចងចាំជាមួយនឹងការលេងដ៏អស្ចារ្យ ប៉ុន្តែក្លិបមួយនេះ បានអះអាងពីការបន្តវិនិយោគ ក្នុងការនាំយកកីឡាករបរទេសមានគុណភាពខ្ពស់ ក៏ដូចជាបណ្តុះបណ្តាលធនធានកីឡាករក្នុងស្រុក ដើម្បីធានាពីការត្រៀមខ្លួនបានល្អ សម្រាប់ប្រកួតប្រជែងនៅរដូវកាលក្រោយ។ នេះបើតាមសេចក្តីថ្លែងការណ៍របស់ក្លិប។
នៅក្នុងសេចក្តីថ្លែងការណ៍ កាលពីថ្ងៃចន្ទ ភ្នំពេញក្រោន បានសង្កត់ធ្ងន់ទៅលើកីឡាករបរទេស ដែលបានរួមរស់ជាមួយក្លិប ក្នុងរយៈពេលពី៤ទៅ៥រដូវកាល ដែលសំដៅទៅលើកីឡាករជប៉ុន Yudai Ogawa, Takaki Ose និងខ្សែបម្រើប្រយុទ្ធរបស់កូឡុំប៊ី Nieto Rondon ដោយអ្នកទាំង៣នេះ បានលេងឱ្យក្រុមភ្នំពេញក្រោន រហូតទទួលបានសញ្ជាតិខ្មែរ និងបានលេងឱ្យក្រុមជម្រើសជាតិកម្ពុជាទៀត។
ចំណែកខ្សែប្រយុទ្ធហូឡង់ Jelle Goselink បានចូលរួមនៅឆ្នាំ២០២៣ ហើយខ្សែប្រយុទ្ធនីហ្សេរីយ៉ា Ibeh Ofufu និងកីឡាករហ្វីលីពីន Javier Gayoso ទើបតែចូលរួមជាមួយភ្នំពេញក្រោន កាលពីឆ្នាំ២០២៤ទេ ប៉ុន្តែក្រោមការដឹកនាំរបស់គ្រូបង្គោល លោក Oleg Starynskyi គឺអ្នកទាំង៣នេះ ក៏បំពេញតួនាទីបានល្អ ក្នុងការជួយដល់ក្រុមមានមូលដ្ឋាននៅកីឡដ្ឋាន Smart RSN ផងដែរ មុនពេលចាកចេញ។
ភ្នំពេញក្រោន បានបញ្ជាក់តាមសេចក្តីថ្លែងការណ៍បែបនេះថា៖ «ជាការពិតណាស់ ពួកគេគឺជាកីឡាករស្នូលរបស់ភ្នំពេញក្រោន អស់រយៈពេល ៤ ឬ ៥ រដូវកាលមកហើយ ហេតុនេះ វាជាពេលវេលា ដែលពួកគេបានសម្រេចចិត្ត ក្នុងការស្វែងរកឱកាសថ្មី និងបទពិសោធន៍បាល់ទាត់ថ្មីសម្រាប់ខ្លួនឯង»។
សេចក្តីថ្លែងការណ៍ដដែល បន្ថែមថា៖ «ថ្នាក់ដឹកនាំក្លិប បានគោរពតាមការសម្រេចចិត្តរបស់ពួកគេ ក្នុងការស្វែងរកការប្រកួតប្រជែងថ្មីៗបន្ថែមទៀត ក្នុងបរិបទរៀងៗខ្លួន ដោយហេតុថា នាពេលកន្លងមក ពួកគេបានលះបង់ពេលវេលាដ៏សំខាន់ នៃអាជីពរបស់ខ្លួនជាមួយក្លិបភ្នំពេញក្រោន ព្រមទាំងបានរួមចំណែកយ៉ាងធំធេងក្នុងការសាងភាពជោគជ័យ និងការរីកចម្រើនរបស់យើងទាំងក្នុង និងក្រៅទីលាន»។
កីឡាករ Nieto Rondon (ជួរក្រោយរាប់ពីស្តាំ) Jelle Goselink, Javier Gayoso, Takaki Ose, Park Yi-Young និង Yudai Ogawa (ជួរមុខរាប់ពីឆ្វេង) ពេលលេងរួមគ្នាឱ្យក្រុមស្វាយរៀង កន្លងមក។ រូបថត ភ្នំពេញក្រោន
គួររំឭកថា ម្ចាស់អាវលេខ១០ Nieto Rondon បានចូលរួមជាមួយភ្នំពេញក្រោន កាលឆ្នាំ២០២០ ចំណែក Yudai Ogawa និង Takaki Ose បានចូលរួមក្នុងឆ្នាំ២០២១ដូចគ្នា ហើយក្នុងរយៈពេលប្រមាណ៥ឆ្នាំនេះ អ្នកទាំង៣ បានរួមចំណែកយ៉ាងសំខាន់ ក្នុងការជួយឱ្យ ភ្នំពេញក្រោន ឈ្នះពានលីគកំពូលកម្ពុជា ចំនួន២លើកជាប់ៗគ្នា កាលពីឆ្នាំ២០២១ និងឆ្នាំ២០២២ ព្រមទាំងឈ្នះជើងឯករង កាលពីរដូវកាលឆ្នាំ២០២៣-២០២៤ និងរដូវកាលឆ្នាំ២០២៤-២០២៥នេះ។
បន្ថែមលើនេះ ពួកគេ ក៏ទើបរួមចំណែកជួយឱ្យក្រុមភ្នំពេញក្រោន ឈ្នះពានរង្វាន់សម្តេច ហ៊ុន សែន ជាលើកទី៣ ក្នុងឆ្នាំ២០២៥នេះ បន្ទាប់ពីក្រុមនេះ បានរង់ចាំអស់រយៈពេល១៦ឆ្នាំ ពោលគឺចាប់តាំងពីបានឈ្នះពាននេះចំនួន២លើកជាប់ៗគ្នា កាលពីឆ្នាំ២០០៨ និងឆ្នាំ២០០៩។
ជាមួយសមិទ្ធផលទាំងអស់នេះ ភ្នំពេញក្រោន បានបញ្ជាក់តាមសេចក្តីថ្លែងការណ៍ថា៖ «ក្នុងអំឡុងពេលដែលពួកគេ បានរួមរស់ជាមួយក្លិបភ្នំពេញក្រោន កីឡាករទាំងនេះ បានបង្ហាញពីវិជ្ជាជីវៈ ទេពកោសល្យ និងការប្តេជ្ញាចិត្តយ៉ាងជាប់លាប់។ ពួកគេជាតួអង្គសំខាន់ក្នុងការទទួលបានជ័យជម្នះដ៏គួរឱ្យចងចាំជាមួយនឹងការលេងដ៏អស្ចារ្យ និងជំរុញការអភិវឌ្ឍន៍ក្រុមរបស់យើង»។
«សមិទ្ធផលដែលពួកគេទទួលបានជាមួយក្លិប វានឹងក្លាយទៅជាកំណត់ត្រាដ៏ស្ថិតស្ថេរ និងយូរអង្វែងមួយ ហើយយើងនឹងចងចាំពួកគេជានិច្ច ព្រោះពួកគេ គឺជាសមាជិកដ៏សំខាន់នៃគ្រួសារភ្នំពេញក្រោន»។ ភ្នំពេញក្រោនបានបញ្ជាក់បន្ថែម តាមសេចក្តីថ្លែងការណ៍របស់ខ្លួន។
ជាមួយគ្នានេះ ក្រុមគ្រួសារបាល់ទាត់ភ្នំពេញក្រោន បានសម្តែងការអរគុណដល់កីឡាករទាំងអស់ ដែលបានរួមចំណែក ខិតខំប្រឹងប្រែង និងលះបង់ជួយដល់ក្រុម គឺពិតជាមានតម្លៃណាស់ ហើយភ្នំពេញក្រោន ក៏បានជូនពរឱ្យកីឡាករបរទេស ដែលបានចាកចេញ ជួបតែសំណាងល្អក្នុងអាជីពបាល់ទាត់ និងការងារផ្ទាល់ខ្លួន ជាពិសេស ភ្នំពេញក្រោន នឹងនៅតែស្វាគមន៍ បើពួកគេ វិលត្រឡប់មកវិញ។
បន្ថែមលើនេះ ភ្នំពេញក្រោន បានបង្ហាញការគោរពទៅដល់អ្នកគាំទ្រ ហើយសូមឱ្យពួកគេរួមគ្នាជាមួយភ្នំពេញក្រោន ក្នុងការបន្តដំណើរទៅមុខទៀត ប្រកបដោយភាពខ្លាំងក្លា ជាមួយនឹងការប្តេជ្ញាចិត្តដ៏មុតមាំក្នុងការកសាងក្រុមដ៏រឹងមាំ និងមានការប្រកួតប្រជែងខ្ពស់ គឺភ្នំពេញក្រោន នឹងបន្តវិនិយោគ ក្នុងការនាំយកកីឡាករបរទេសមានគុណភាពល្អៗ ដើម្បីបញ្ជាក់ពីការត្រៀមខ្លួនកាន់តែល្អ សម្រាប់ប្រកួតប្រជែងនៅរដូវកាលក្រោយ។
ភ្នំពេញក្រោន បានបញ្ជាក់តាមសេចក្តីថ្លែងការណ៍បែបនេះថា៖ «ក្លិបនឹងបន្តវិនិយោគលើការពង្រឹងទេពកោសល្យ សមត្ថភាព ការអភិវឌ្ឍ និងបណ្តុះបណ្តាលធនធានកីឡាករ ស្របទៅតាមទស្សនវិស័យរបស់យើង ដើម្បីធានាថា យើងបានត្រៀមខ្លួនបានល្អ សម្រាប់បញ្ហាប្រឈម និងឱកាសថ្មីៗនៅរដូវកាលខាងមុខនេះ»។
យ៉ាងណាក៏ដោយ គិតមកដល់ពេលនេះ ភ្នំពេញក្រោន នៅមិនទាន់បានប្រកាស ពីការនាំចូលកីឡាករបរទេសណាមួយ សម្រាប់ត្រៀមរដូវកាលថ្មីនៅឡើយទេ ប៉ុន្តែគ្រូបង្គោលលោក Oleg Starynskyi ដែលបានសម្រេចបន្តកិច្ចសន្យាជាមួយភ្នំពេញក្រោន ២ឆ្នាំទៀតនោះ បានបញ្ជាក់ថា៖ «គោលដៅរបស់យើង គឺត្រូវទទួលបានជោគជ័យបន្ថែមទៀត សម្រាប់ក្លិប ទាំងនៅក្នុងស្រុក និងនៅឆាកអន្តរជាតិ។ ទោះបីជាយើង ជាក្លិបដែលជោគជ័យជាងគេមែន តែយើងនៅតែស្រេកឃ្លាន និងចង់បានពានរង្វាន់បន្ថែមទៀត»៕
