លោក Matthew McConkey ពេលថ្លែងក្នុងសន្និសីទកាសែត បន្ទាប់ពីលោកត្រូវបានប្រកាសឱ្យធ្វើជាគ្រូបង្គោលក្លិបព្រះខ័នរាជស្វាយរៀង។ រូបថត ស្វាយរៀង
នៅទីបំផុតក្លិបព្រះខ័នរាជស្វាយរៀង បានសម្រេចតែងតាំងគ្រូជំនួយលោក Matthew McConkey ឱ្យឡើងមកធ្វើជាគ្រូបង្គោល ដោយរំពឹងថា គ្រូបង្វឹកថ្មីនេះ នឹងអាចបង្កើតបាននូវសមិទ្ធផលថ្មីៗ បន្ថែមទៅលើសមិទ្ធផល ដែលសម្រេចបាន ក្រោមការដឹករបស់គ្រូបង្គោលលោក Pep Munoz ដែលទើបបានចាកចេញ។
នៅក្នុងសន្និសីទកាសែត បង្ហាញបេក្ខភាពគ្រូបង្គោលថ្មី កាលពីរសៀលថ្ងៃអង្គារ លោក Christopher William Grant អ្នកចាត់ការទូទៅក្រុមព្រះខ័នរាជស្វាយរៀង បានអះអាង ថា លោក Matthew បានធ្វើជាគ្រូជំនួសរយៈពេល៤ឆ្នាំជាមួយក្រុមស្វាយរៀង ទាំងជាមួយគ្រូបង្គោលលោក Conor Nestor និងលោក Pep Munoz អ៊ីចឹងគាត់បានស្គាល់រួចហើយពីបរិបទនៅក្នុងក្លិប ក៏ដូចជាស្គាល់ពីបុគ្គលិក និងកីឡាករនៅកម្ពុជា។
លោក Christopher បានបន្ថែមថា នៅក្នុងអំឡុងដែលក្រុមព្រះខ័នរាជស្វាយរៀង បានឈ្នះតំណែងជើងឯកលីគកំពូលកម្ពុជា ២ឆ្នាំជាប់ៗគ្នា និងឈ្នះតំណែងជើងឯកពានរង្វាន់សម្តេច ហ៊ុន សែន ឆ្នាំ២០២៤ ជាពិសេសការឡើងទៅដល់វគ្គផ្តាច់ព្រ័ត្រពានរង្វាន់ AFC Challenge League ឆ្នាំ២០២៥នេះ គឺមានការរួមចំណែកជាច្រើនពីលោក Matthew ហើយនេះជាអ្វីដែលក្លិបបានជ្រើសរើសយកគាត់ ធ្វើជាគ្រូបង្គោល។
លោក Christopher បានបញ្ជាក់ថា៖ «លោក Matthew បានរួមចំណែកជាច្រើន ក្នុងការនាំយកភាពជោគជ័យឱ្យក្លិបក្នុងនាមជាគ្រួជំនួយ៤ឆ្នាំមកនេះ ហេតុនេះថ្នាក់ដឹកនាំក្លិបរបស់យើង មិនបានគិតច្រើនទេ ក្នុងការជ្រើសរើសឱ្យគាត់ធ្វើជាគ្រូធំ គឺគាត់ពិតជាស័ក្តិសម ហើយយើងមានទំនុកចិត្តថា គ្រូបង្គោលថ្មីនេះ នឹងដឹកនាំក្រុមឆ្ពោះទៅបង្កើតបាននូវសមិទ្ធផលផ្សេងៗបន្ថែមទៀត»។
យ៉ាងណាក៏ដោយ លោក Christopher មិនចង់ឱ្យមានការប្រៀបធៀបសមិទ្ធផល ដែលបង្កើតបានក្រោមការដឹកនាំរបស់អតីតគ្រូបង្គោលលោក Pep Munoz ជាមួយគ្រូបង្គោលថ្មីលោក Matthew ដែលនឹងត្រូវដឹកនាំក្រុមស្វាយរៀង នៅរដូវកាលនេះទេ។
លោកបានសង្កត់ធ្ងន់ថា៖ «ក្លិបរបស់យើងតែងតែឆ្ពោះទៅមុខ អ៊ីចឹងអ្វីដែលយើងត្រូវធ្វើ គឺយើងតែងតែស្រេកឃ្លាននូវជ័យជម្នះ និងស្វែងរកជ័យជម្នះជូនអ្នកគាំទ្រ ហេតុនេះយើងមិនចង់ឱ្យមានការប្រៀបធៀបនូវសមិទ្ធផលគ្រូចាស់ ជាមួយគ្រូថ្មីនោះទេ»។
ជាមួយគ្នានេះ លោក Matthew បានទទួលស្គាល់ថា ការឡើងមកធ្វើជាគ្រូបង្គោលនេះ ពិតជាមានសម្ពាធជាងការធ្វើជាគ្រូជំនួយ ប៉ុន្តែគ្រូបង្វឹកមកពីអៀរឡង់ខាងជើង កាន់អាជ្ញាប័ណ្ណ UEFA A Licence រូបនេះ បានអះអាងថា ការទទួលបានការជឿជាក់ ដើម្បីក្លាយជាគ្រូបង្គោលនៅក្លិបព្រះខ័នរាជស្វាយរៀងនេះ គឺពិតជាសំខាន់បំផុត នៅក្នុងជីវិតរបស់លោក។
លោកបញ្ជាក់ថា៖ «នេះជាការសម្រេចចិត្តដ៏ធំ នៅក្នុងជីវិតរបស់ខ្ញុំ ក្នុងការបានធ្វើជាគ្រូបង្គោលក្រុមព្រះខ័នរាជស្វាយរៀង ហើយគ្រូជាច្រើនទៀត ក៏តែងតែចង់ធ្វើជាគ្រូធំបែបនេះដែរ គឺយើងមិនអាចធ្វើជាគ្រូជំនួយអស់មួយជីវិតនោះទេ អ៊ីចឹងការសម្រេចចិត្តធ្វើជាគ្រូធំ ខ្ញុំសម្រេចចិត្តតែ៣វិនាទីទេ ហើយខ្ញុំសូមអំណរគុណដល់លោក Christopher និងឯកឧត្តម ឌី វិជ្ជា ជាប្រធានក្លិប ដែលបានជឿជាក់ និងផ្តល់ទំនុកចិត្តឱ្យខ្ញុំក្លាយជាគ្រូបង្គោលរបស់ក្លិបព្រះខ័នរាជស្វាយរៀង»៕
