លោក Koji Gyotoku (ឆ្វេង) បានចាប់ដៃស្វាគមន៍លោក Gela Shekiladze នៅក្នុងសន្និសីទកាសែត កាលពីថ្ងៃពុធ។ រូបថត CPL
គ្រូបង្គោលក្រុមជម្រើសជាតិតាជីគីស្ថាន លោក Gela Shekiladze បានអះអាងថា ការប្រកួតមិត្តភាពអន្តរជាតិ នៅពហុកីឡដ្ឋានជាតិអូឡាំពិក នាយប់ម៉ោង៧ ថ្ងៃព្រហស្បតិ៍នេះ ក្រុមជម្រើសជាតិកម្ពុជា នឹងខំប្រឹងប្រែងលេង១០០ភាគរយ ដើម្បីទប់ទល់ជាមួយក្រុមរបស់លោក បើទោះបីជា ក្រុមម្ចាស់ផ្ទះមួយនេះ អវត្តមានកីឡាករសំខាន់ៗមួយចំនួន ហើយបានដាក់កីឡាករវ័យក្មេងមកជំនួសក៏ដោយ។
នៅក្នុងសន្និសីទកាសែត កាលពីល្ងាចថ្ងៃពុធ លោក Gela Shekiladze បានលើកឡើងថា ការអវត្តមានកីឡាករសំខាន់ៗ ក្នុងការប្រកួតឱ្យក្រុមជម្រើសជាតិ វាតែងតែកើតមានឡើង នៅក្នុងបាល់ទាត់។ ជាក់ស្តែងក្រុមម្ចាស់ផ្ទះកម្ពុជា នៅពេលនេះ អវត្តមានកីឡាករសំខាន់ៗមួយចំនួនធំ ប៉ុន្តែលោកជឿជាក់ថា កីឡាករកម្ពុជា ដែលមានវត្តមាន នឹងខំប្រឹងប្រែងលេង១០០ភាគរយទល់ជាមួយក្រុមរបស់លោក។
លោកបានថ្លែងថា៖ «បើទោះបីជា ក្រុមកម្ពុជា មានការខកខានកីឡាករសំខាន់ៗមួយចំនួនមែន ប៉ុន្តែខ្ញុំជឿថា ក្រុមកម្ពុជា នឹងលេខ១០០ភាគរយ ប្រឹងប្រែង១០០ភាគរយ ហើយវាជារឿងធម្មតាទេ នៅក្នុងបាល់ទាត់ ដែលពេលខ្លះកីឡាករមួយចំនួន ត្រូវខកខានការប្រកួតបែបហ្នឹង ដោយសាររបួស និងបញ្ហាផ្សេងៗ»។
សម្រាប់ការប្រមូលផ្តុំលើកនេះ កីឡាករបរទេសមានសញ្ជាតិខ្មែរ មានទម្រង់លេងល្អ Yudai Ogawa, Takaki Ose, Nieto Rondon និង Abdel Kader Coulibaly សុទ្ធតែមិនបានចូលរួមជាមួយក្រុមជម្រើសជាតិកម្ពុជា ហើយកីឡាករខ្មែរមួយចំនួនទៀត ដែលធ្លាប់លេងក្នុងជម្រើស១១នាក់ដំបូង ដូចជា សឿយ វិសាល, អ៊ន ចាន់ប៉ូលីន និង ថេឡរ នីកូឡាស់ ជាដើម ក៏មិនបានចូលរួមដូចគ្នា។
តែទោះបីជាយ៉ាងណា លោក Gela Shekiladze បញ្ជាក់ថា៖ «ខ្ញុំគិតថា កម្ពុជា ទោះបីជាអត់មានកីឡាករសំខាន់ៗទាំងអស់នោះ ក៏កីឡាករដែលបានចូលមកជំនួស នឹងខំប្រឹងលេង១០០ភាគរយ ចំណែកក្រុមរបស់យើងក៏នឹងខំប្រឹងដូចគ្នា គឺក្រុមទាំង២ នឹងលេង១០០ភាគរយដូចគ្នា ហើយខ្ញុំជឿជាក់ថា ការមានគ្រូបង្វឹកល្អ ការរៀបចំល្អ បុគ្គលិកនិងគ្រូជំនួយល្អ និងមានកីឡាករល្អ គឺក្រុមទាំង២ នឹងធ្វើបានល្អសម្រាប់ការប្រកួតនេះ»។
សកម្មភាពហ្វឹកហាត់ថ្ងៃចុងក្រោយរបស់ក្រុមជម្រើសជាតិកម្ពុជា នៅពហុកីឡដ្ឋានជាតិអូឡាំពិក កាលពីថ្ងៃពុធ ត្រៀមជួបក្រុមជម្រើសជាតិតាជីគីស្ថាន នៅយប់នេះ។ រូបថត CPL
ចំណែកលោក Koji Gyotoku គ្រូបង្គោលក្រុមជម្រើសជាតិកម្ពុជា បានចាត់ទុកក្រុមជម្រើសជាតិតាជីគីស្ថាន គឺជាក្រុមខ្លាំង ដែលមានធនធានកីឡាករល្អៗ ខ្ពស់ៗ និងមានគុណភាពលេងខ្ពស់ ប៉ុន្តែលោកសប្បាយចិត្ត ក្នុងការជួបក្រុមមួយនេះ ហើយលោកនឹងព្យាយាមប្រើប្រាស់កីឡាករឱ្យបានច្រើន តាមដែលអាចធ្វើទៅបាន ដើម្បីឱ្យពួកគេ មានឱកាសបង្ហាញសមត្ថភាព។
យ៉ាងណាក៏ដោយ លោក Koji បានទទួលស្គាល់ថា កីឡាករដែលបានប្រមូលផ្តុំ ក្នុងក្រុមជម្រើសជាតិលើកនេះ គឺកីឡាករមួយចំនួន នៅមានការនឿយហត់នៅឡើយ ហើយមួយចំនួនទៀត ក៏មិនទាន់ពេញល្អប៉ុន្មានដែរ ប៉ុន្តែលោកនឹងលៃលកធ្វើយ៉ាងណា ឱ្យពួកគាត់លេងបាន និងលេងឱ្យបានល្អជាងកីឡាករបានអវត្តមាន។
លោក Koji បញ្ជាក់ថា៖ «អ្វីដែលខ្ញុំចង់បានពីកីឡាករវ័យក្មេង ដែលនឹងត្រូវដាក់ឱ្យលេងលើកនេះ គឺត្រូវប្រឹងលេងឱ្យអស់ពីសមត្ថភាព ដើម្បីបង្ហាញសមត្ថភាពរបស់ពួកគាត់ថា អាចធ្វើបានល្អជាងកីឡាករ ដែលបានអវត្តមាន។ ខ្ញុំចង់ឱ្យពួកគាត់បង្ហាញខ្លួនឱ្យបានល្អ ទៅតាមអ្វីដែលគាត់ធ្វើបាន និងអស់ពីសមត្ថភាពរបស់ពួកគាត់»៕
