![](https://pppkhmer.sgp1.digitaloceanspaces.com/image/main/20245/29_5_2024_bokor_mounts_cambodia.jpg)
ទិដ្ឋភាពមើលទៅសមុទ្រ ពីលើភ្នំបូកគោ។ រូបថត ហុង រស្មី
ក្រុងបូកគោ៖ ឧទ្យានជាតិព្រះមុនីវង្ស «បូកគោ» អតីតរីសតវិស្សមកាលរដូវក្ដៅរបស់អាណានិគមនិយមបារាំង និងជាព្រះរាជដំណាក់របស់ព្រះមហាក្សត្រ គឺជាគោលដៅទេសចរណ៍ពេញនិយមរបស់ភ្ញៀវទេសចរមកផ្លាស់ប្ដូរបរិយាកាស ៣ រដូវក្នុងរយៈពេលតែមួយថ្ងៃ។
លោក ពុយ គា ប្រធានក្លឹបអ្នកកាសែតកម្ពុជា (CCJ) បានលើកឡើងពីចំណុចពិសេសនេះទៅកាន់ក្រុមអ្នកសារព័ត៌មានមកពីប្រមាណ ៣០ ស្ថាប័ន ដែលបានចូលរួមក្នុងការ «ផ្សព្វផ្សាយទ្រង់ទ្រាយធំពីសក្ដានុពល នៃការអភិវឌ្ឍក្រុងបូកគោ» ដែលរៀបចំឡើងរយៈពេល ៣ថ្ងៃ ចាប់ពីថ្ងៃទី២៨ ដល់ថ្ងៃទី៣០ ខែឧសភា ឆ្នាំ២០២៤។
លោកបានថ្លែងថា៖ «ធម្មតាក្នុងមួយឆ្នាំ មានតែពីររដូវនោះទេ គឺក្ដៅ និងត្រជាក់ ឬរដូវប្រាំង និងរដូវវស្សា។ ដោយឡែកនៅលើភ្នំបូកគោនេះ មួយថ្ងៃអាចមាន ៣ រដូវតែម្ដង ដោយវាអាចប្រែប្រួលពីក្ដៅទៅត្រជាក់ និងភ្លៀង ឬចុះអ័ព្វ។ នេះជាលក្ខណៈពិសេសរបស់ក្រុងបូកគោ»។
លោក គា បានរៀបចំដំណើរកម្សាន្តរបស់អ្នកសារព័ត៌មាន ដើម្បីទាក់ទាញភ្ញៀវទេសចរជាតិ និងអន្តរជាតិ មកកាន់ប្រទេសកម្ពុជា ជាពិសេសទៅកាន់ភ្នំបូកគោ ក្នុងរដូវកាលនេះ ដើម្បីបង្ហាញពីអាកាសធាតុ និងទេសភាពដ៏ស្រស់ត្រកាលរបស់វា។
លោក ពុយ គា បាននិយាយថា គ្រប់គ្នាបំពាក់ម៉ាស៊ីនត្រជាក់នៅក្នុងផ្ទះ ហើយនៅពេលក្ដៅ ពួកគេប្រាកដជាចូលបន្ទប់។ ប៉ុន្ដែនៅពេលពួកគេទទួលបានអាកាសធាតុត្រជាក់នៅវាលលំហបែបនេះ វាកាន់តែអស្ចារ្យ ពីព្រោះនរណាក៏ចង់ស្រូបយកខ្យល់អាកាសល្អបរិសុទ្ធ។
ភ្ញៀវដែលស្នាក់នៅលើភ្នំបូកគោនឹងយល់ឃើញថា ម៉ាស៊ីនត្រជាក់គឺមិនចាំបាច់ទេ ព្រោះសីតុណ្ហភាពពេលយប់ជាធម្មតាធ្លាក់ចុះក្រោម ២០ អង្សារសេ។
![](https://pppkhmer.sgp1.cdn.digitaloceanspaces.com/image/main/20245/29_5_2024_yey_mao_at_bokor_mounts.jpg)
រូបសំណាកលោកយាយម៉ៅលើកំពូលភ្នំបូកគោ ដែលភ្ញៀវទេសចរកម្ររំលងចូលបុណ្យស្រន់សុំសេចក្តីសុខសប្បាយ។ រូបថត ហុង រស្មី
ភាពត្រជាក់ធម្មជាតិនេះផ្តល់នូវបរិយាកាសសុខស្រួល និងស្រស់ស្រាយ ធានាបាននូវផាសុកភាពដោយមិនចាំបាច់ត្រូវការភាពត្រជាក់សិប្បនិម្មិតឡើយ។
ខ្យល់ភ្នំត្រជាក់ គួបផ្សំនឹងបរិយាកាសដ៏ស្ងប់ស្ងាត់ បង្កើតកន្លែងសម្រាកដ៏ល្អសម្រាប់អ្នកដែលស្វែងរកការគេចចេញពីភាពស្អុះស្អាប់។
ស្ថិតនៅរយៈកម្ពស់ជាង១ពាន់ម៉ែត្រលើនីវ៉ូទឹកសមុទ្រ ឧទ្យានជាតិព្រះមុនីវង្ស «បូកគោ» ផ្ដល់នូវខ្យល់អាកាសត្រជាក់ ដែលជំនួយដល់សុខភាពសួត និងកាត់បន្ថយភាពស្មុគស្មាញ។
ប្រធានក្លិបអ្នកកាសែតកម្ពុជា លោក ពុយ គា បានបន្ដថា តំបន់ទេសចរណ៍ដែលមានអាកាសធាតុបីរដូវក្នុងមួយថ្ងៃ គឺនៅភូមិភាគឦសាននៃទឹកដីខេត្តមណ្ឌលគិរី ឧទ្យានជាតិគីរីរម្យក្នុងខេត្តកំពង់ស្ពឺ និងទីក្រុងបូកគោ ក្រៅពីតំបន់ព្រៃភ្នំ ជាទេសចរណ៍បែបផ្សងព្រេង។
ភ្នំបូកគោ ជាឧទ្យានជាតិព្រះមុនីវង្ស ដែលគេស្គាល់ជាទូទៅថាឧទ្យានជាតិបូកគោ តាមព្រះរាជក្រឹត្យនៅថ្ងៃទី១ ខែវិច្ឆិកាឆ្នាំ ១៩៩៣ ស្ថិតនៅលើជួរភ្នំដំរី និងមានផ្ទៃក្រលាចំនួន ១៤០ ០០០ ហិកតា សន្ធឹងដល់ខេត្តកំពង់ស្ពឺនិងខេត្តព្រះសីហនុ។
![](https://pppkhmer.sgp1.cdn.digitaloceanspaces.com/image/main/20245/29_5_2024_bokor_mounts_cambodia_1.jpg)
ថ្មយក្សនៅលើភ្នំបូកគោ។ រូបថត ហុង រស្មី
ដោយសម្បូររុក្ខជាតិប្លែកៗ និងជាដែនជម្រកធម្មជាតិរបស់សត្វព្រៃ និងសត្វស្លាបជាច្រើនប្រភេទ ឧទ្យានជាតិបូកគោ ត្រូវបានចាត់ចូលក្នុងបញ្ជីឧទ្យានបេតិកភណ្ឌអាស៊ានមួយក្នុង ឧទ្យានបេតិកភណ្ឌអាស៊ានពីររបស់ព្រះរាជាណាចក្រកម្ពុជានៅក្នុងឆ្នាំ ២០០៤។
យោងតាមលោក ធឿន ប៊ុនថាន ប្រធានផ្នែកលក់នៃរមណីយដ្ឋាន សុខាឋានសួគ៌ បានឱ្យដឹងថា នៅឆ្នាំ ២០០៨ រាជរដ្ឋាភិបាលកម្ពុជា បានប្រគល់ឧទ្យានជាតិនេះឱ្យក្រុមហ៊ុនសុខាអូតែល វិនិយោគរយៈពេល ៩៩ឆ្នាំ ដើម្បីអភិវឌ្ឍជារមណីយដ្ឋានទេសចរណ៍ដ៏ទាក់ទាញសំខាន់មួយ។
ក្រុមហ៊ុនសុខាអូតែល បានចាប់ផ្តើមដំណើរការសាងសង់ពង្រីកផ្លូវពីជើងភ្នំឡើងទៅលើកំពូលភ្នំប្រវែង ៣៣ គីឡូម៉ែត្រ «មហារុក្ខវិថីគីរីតេជោ» និងកសាងសណ្ឋាគារនាពេលដំណាលគ្នា លើកំពូលភ្នំដែលមានសណ្ឋានជាផ្កាយីហុប ព្រមទាំងសាងសង់ហេដ្ឋារចនាសម្ព័ន្ធផ្គត់ផ្គង់ ទឹក អគ្គិសនី និងប្រព័ន្ធផ្លូវខ្វាត់ខ្វែងដើម្បីសម្រួលដល់ការធ្វើដំណើរកម្សាន្តរបស់ភ្ញៀវទេសចរ។
លោក ប៊ុនថាន បាននិយាយថា៖ «លើសពីនេះទៀត ក្រុមហ៊ុន សុខាអូតែល ក៏បានដំណើរការជួសជុសឡើងវិញ និងថែទាំសំណង់ចាស់ៗដែលបន្សល់ពីសម័យ អាណានិគមបារាំង និងសង្គមរាស្ត្រនិយម មានដូចជា អាគារសាលាក្រុង និងអាគារកាស៊ីណូចាស់ជាដើម»។
![](https://pppkhmer.sgp1.cdn.digitaloceanspaces.com/image/main/20245/29_5_2024_20240528_112136.jpg)
ភ្ញៀវទេសចរថតរូបកម្សាន្តនៅក្នុងសំណង់អគារសម័យសង្គមរាស្ត្រនិយម។ រូបថត ហុង រស្មី
បន្ទាប់ពីបញ្ចប់ការកសាងហេដ្ឋារចនាសម្ព័ន្ធ និងសំណង់សណ្ឋាគារ រមណីយដ្ឋានឋានសួគ៌បូកគោ ត្រូវបើកសម្ពោធ ជាផ្លូវការនៅថ្ងៃទី៣ ខែឧសភា ឆ្នាំ២០១២ ក្រោមអធិបតីភាពលោក ហ៊ុន សែន ដែលលោកជានាយករដ្ឋមន្ត្រីនាពេលនោះ។ បច្ចប្បន្ន លោក ហ៊ុន សែន ជាប្រធានព្រឹទ្ធសភា។
សព្វថ្ងៃនេះបូកគោបានទាក់ទាញភ្ញៀវទេសចរ រួមមាន ទេសចរណ៍ធម្មជាតិ ទេសចរណ៍វប្បធម៌ ទេសចរណ៍បែបជំនឿ ទេសចរណ៍ច្នៃប្រឌិត និងកសិ-ទេសចរណ៍។
ថ្មមុខយក្ស ឬអ្នកថែរក្សាព្រៃ ទឹកជ្រោះពពកវិល វាលស្រែ ៥០០ តំបន់ថ្មប្រាសាទ ក្លោងទ្វារមេឃ ល្អាងសមាធិ ព្រះរាជដំណាក់ស្លាខ្មៅ ព្រះវិហារកាតូលិក និងជាពិសេសរូបសំណាកព្រះពុទ្ធកម្ពស់ ១០៨ ម៉ែត្រដែលបាននិងកំពុងត្រូវបានសាងសង់ ស្ថិតនៅក្នុងបញ្ជីទស្សនារបស់ភ្ញៀវទេសចរ៕