ក្រុមស្រ្តីអុំទូកទេសចរនៅកំពង់ភ្លុក រង់ចាំដឹកភ្ញៀវទេសចរ កម្សាន្តក្នុងព្រៃលិចទឹកសហគមន៍។ រូបថត សហគមន៍ដឹកភ្ញៀវទេសចរមានជ័យ-កំពង់ភ្លុក
សៀមរាបៈ ក្រុមស្រ្តីអុំទូកទេសចរជាង១ពាន់នាក់ នៅកំពង់ភ្លុក កំពុងតែទទួលបានការចាប់អារម្មណ៍ពីភ្ញៀវជាតិ-អន្តរជាតិ ដែលមុខរបររដូវសង្សានេះជួយរកប្រាក់ចំណូលបន្ថែម ក៏ដូចជាលើកកម្ពស់តម្លៃស្រ្តីផងដែរ។
នៅក្នុងទូកឈើតូច ដែលមានក្រាលកន្ទេល អាវពោង ឆ័ត្រ និងខ្នោយជាដើមផងនោះ ក្រុមស្រ្តីអុំទូកទេសចរតែងតែមកជួបជុំគ្នារង់ចាំដឹកភ្ញៀវនៅក្រោមដើមឈើចោលម្លប់ដ៍ត្រជាក់។ ពួកគាត់ភាគច្រើន ជាស្រ្តីមានវ័យកណ្តាល ដែលរស់នៅក្នុងភូមិទាំង៣ នៃឃុំកំពង់ភ្លុក ស្រុកប្រាសាទបាគង ដែលជាតំបន់ទេសចរណ៍ធម្មជាតិលើផ្ទៃបឹងទន្លេសាបមួយដ៏មានប្រជាប្រិយភាព។
ដៃកាន់ច្រវ៉ា ដោយអង្គុយលើក្បាលទូក ពួកគាត់ត្រៀមខ្លួនជាស្រេចនៅចាំហ្នឹងមាត់ព្រៃ ដើម្បីចែវទូកនាំអ្នកទេសចរ ដែលភាគច្រើនជាជនបរទេសទៅកម្សាន្តចូលក្នុងព្រៃលើផ្ទៃបឹងទន្លេសាប ប្រកបដោយបរិយាកាសបរិសុទ្ធ ជាពិសេសទទួលបានបទពិសោធន៍ ដែលពួកគេមិនធ្លាប់មានពីមុនមក។
ក្រុមស្ត្រីអុំទូកទាំងអស់មិនត្រឹមតែជាអ្នកអុំទូកដ៏ជំនាញប៉ុណ្ណោះទេ ប៉ុន្តែពួកគាត់ថែមទាំងជាមគ្គុទ្ទេសក៍ទេសចរ ដែលអាចពន្យល់រៀបរាប់ដល់ភ្ញៀវអំពីលក្ខណៈស្ថានភាព ធម្មជាតិ ប្រពៃណីទំនៀមទម្លាប់ និង សក្តានុពល ដែលមានក្នុងសហគមន៍ ប្រកបដោយស្នាមញញឹម រួសរាយរាក់ទាក់ ស្និទ្ធស្នាលផ្តល់នូវភាពកក់ក្តៅ។ នេះជាការលើកឡើងរបស់រដ្ឋបាលស្រុកបាគង។
លោក សាង គង់ ប្រធានសហគមន៍ទេសចរណ៍ធម្មជាតិកំពង់ភ្លុកបានឱ្យដឹងថា ក្រុមស្រ្តីអុំទូកដឹកភ្ញៀវទេសចរនេះត្រូវបានបង្កើតឡើងតាំងពីឆ្នាំ ២០១៣មកម៉្លេះ ហើយនាពេលបច្ចុប្បន្ននេះមានចំនួន ១ ០៥៨ទូក។ ក្នុងមួយគ្រួសារមានទូកចំនួនមួយ ដែលរស់នៅក្នុងភូមិត្នោតកំបុត ភូមិដីក្រហម និងភូមិគោកក្តុល។
លោកបញ្ជាក់ថា៖ «ការបង្កើតឱ្យមានក្រុមស្រ្តីអុំទូកនេះ គឺដោយសារតែយើងចង់លើកកម្ពស់ស្រ្តីឱ្យមានមុខរបរដូចបុរសដែរ។ ឱ្យស្រ្តីកាន់តែមានភាពថ្លៃថ្នូរ ដែលពីមុន ចាស់បុរាណតែងតែនិយាយថា ស្រ្តីបង្វិលចង្រ្កាន្តមិនជុំ តែឥលូវយើងធ្វើស្រ្តីហ្នឹងបង្វិលចង្ក្រាន្តឱ្យជុំ»។
ភ្ញៀវទេសចរជិះទូកកម្សាន្ត អុំដោយស្ត្រីសហគមន៍ទេសចរណ៍កំពង់ភ្លុក ក្នុងខេត្តសៀមរាប។ រូបថត សហគមន៍ដឹកភ្ញៀវទេសចរមានជ័យ-កំពង់ភ្លុក
លោកបន្តថា ក្នុងការដឹកភ្ញៀវទេសចររបស់ក្រុមស្ត្រីអុំទូកតូចនេះ ដើម្បីឱ្យមានស្មើភាពគ្នា គឺមានការដាក់លេខរៀងទៅតាមចំនួនភ្ញៀវដែលទៅកម្សាន្តប្រចាំថ្ងៃ។ ហេតុនេះ មិនមែនទូកទាំងអស់បានចេញដឹកភ្ញៀវទាំងអស់នោះទេ ជារៀងរាល់ថ្ងៃ។ ទោះយ៉ាងណា សហគមន៍ក៏បានផ្តល់អាទិភាពឱ្យទូកស្រ្តីចាស់ជរាចំនួន ៥នាក់ប្រចាំថ្ងៃ ដោយមានកូន ក្មួយ ឬចៅអ្នកអុំជំនួស ដើម្បីជួយដោះស្រាយជីវភាពគ្រួសារដែរ ដោយមិនចាំបាច់ដាក់លេខរៀងនោះទេ។
លោកបន្ថែមថា នេះគឺគ្រាន់តែជាមុខរបររដូវវស្សាមួយតែប៉ុណ្ណោះ ដែលមានរយៈពេលចន្លោះពីខែសីហាទៅដល់ប្រហែលជាចុងខែវិច្ឆិកា ឬ ដើមខែធ្នូប៉ុណ្ណោះ។ អ្នកទេសចរអាចកម្សាន្ត មើលនៅក្នុងភូមិ ពីជីវភាពការរស់នៅរបស់ពលរដ្ឋ មើលផ្ទះដែលមានសសរខ្ពស់ៗ ផុតពីទឹក ការធ្វើប្រហុក ត្រីឆ្អើរ អុំទូកតូចនៅក្នុងព្រៃមើលសត្វស្លាប ស្វា មើលថ្ងៃលិច ឬការនេសាទរបស់សហគមន៍ជាដើម។
លោក ឃុត វ៉ាន់ដា សមាជិកសហគមន៍ដឹកភ្ញៀវទេសចរមានជ័យ-កំពង់ភ្លុកបានឱ្យដឹងថា តម្លៃទូកដែលអុំស្រ្តីមានតម្លៃ ៦ដុល្លារ ដែលជិះបានភ្ញៀវ ២នាក់ ក្នុងរយៈពេលប្រហែលជា ៣០នាទី។ ក្នុងមួយថ្ងៃៗ ទូកតូចដែលអុំទូកដោយក្រុមស្រ្តីប្រហែលជា ៧០ទូកដែរចេញដឹកភ្ញៀវ។ ក្រៅពីនោះ ក៏មានទូកកាណូតធំៗ ដែលមានជាង ៨០០គ្រឿងផងដែរ ដែលមានតម្លៃ ២០ដុល្លារដែលមានរយៈពេលចន្លោះពី ២ ទៅ ២ ម៉ោងកន្លះ។
លោកថ្លែងដូច្នេះថា៖ «បុរសៗទៅនេសាទ បើកទូក ឬកាណូត តែស្រី្តសល់ពេលទំនេរនៅផ្ទះ ក៏ខាងសហគមន៍បានរៀបចំស្រ្តីឱ្យអុំទូកដឹកភ្ញៀវទេសចរ ដើម្បីរួមចំណែកជួយរកចំណូលបន្ថែមទៀតសម្រាប់ផ្គត់ផ្គង់ជីវភាពគ្រួសារ។ ភាគច្រើនជាស្រ្តីវ័យកណ្តាល និង មនុស្សចាស់ ដែលទំនេរដែលអាចអុំទូកបាន។ ភ្ញៀវទេសចរចាប់អារម្មណ៍ច្រើនលើទូកស្រ្តីអុំនេះ ក្រោយពីមានការចែកចាយតាមបណ្តាញសង្គម»។
យោងតាមមន្ទីរព័ត៌មានខេត្តសៀមរាបបានឱ្យដឹងថា ក្នុងរយៈពេល ៧ខែនៃឆ្នាំ ២០២៤ នេះ មានភ្ញៀវទេសចរទៅកម្សាន្តនៅកំពង់ភ្លុកជាង ២២ម៉ឺននាក់៕
